‘‘ฉนฺโท นิทานํ คาถานํ, อกฺขรา ตาสํ วิยญฺชนํ;
นามสนฺนิสฺสิตา คาถา, กวิ คาถานมาสโย’’ติฯ
ชราวคฺโค ฉฏฺโฐฯ
ตสฺสุทฺทานํ –
ชรา อชรสา มิตฺตํ, วตฺถุ ตีณิ ชนานิ จ;
อุปฺปโถ จ ทุติโย จ, กวินา ปูริโต วคฺโคติฯ
7. อทฺธวคฺโค
1. นามสุตฺตํ
[61]
‘‘กิํสุ สพฺพํ อทฺธภวิ [อนฺวภวิ (สี.)], กิสฺมา ภิยฺโย น วิชฺชติ;
กิสฺสสฺสุ เอกธมฺมสฺส, สพฺเพว วสมนฺวคู’’ติ [วสมทฺธคู (ก.)]ฯ
‘‘นามํ สพฺพํ อทฺธภวิ, นามา ภิยฺโย น วิชฺชติ;
นามสฺส เอกธมฺมสฺส, สพฺเพว วสมนฺวคู’’ติฯ
2. จิตฺตสุตฺตํ
[62]
‘‘เกนสฺสุ นียติ โลโก, เกนสฺสุ ปริกสฺสติ;
กิสฺสสฺสุ เอกธมฺมสฺส, สพฺเพว วสมนฺวคู’’ติฯ
‘‘จิตฺเตน นียติ โลโก, จิตฺเตน ปริกสฺสติ;
จิตฺตสฺส เอกธมฺมสฺส, สพฺเพว วสมนฺวคู’’ติฯ
3. ตณฺหาสุตฺตํ
[63]
‘‘เกนสฺสุ นียติ โลโก, เกนสฺสุ ปริกสฺสติ;
กิสฺสสฺสุ เอกธมฺมสฺส, สพฺเพว วสมนฺวคู’’ติฯ
‘‘ตณฺหาย นียติ โลโก, ตณฺหาย ปริกสฺสติ;
ตณฺหาย เอกธมฺมสฺส, สพฺเพว วสมนฺวคู’’ติฯ